Franklin D. Roosevelt

Dr Franklin Delano Roosevelt [ˈfɹæŋklɪn ˈdɛlənoʊ ˈɹoʊzəvɛlt] (* 30. Januar 1882 in Hyde Park, Nöi York; † 12. April 1945 z Warm Springs, Georgia), vilmol nume mit sine Initiale FDR, isch vo 1933 bis zu sim Dood 1945 dr 32. Bresidänt vo de Veräinigte Staate gsi. Er isch dr Kandidat vo dr Demokratische Bardei gsi und noch sinere erste Amtszit dreimol wiidergweelt worde (1936, 1940 und 1944) – er isch dr äinzig amerikanisch Bresidänt, wo lenger as zwäi Amtsperiode im Bresidänt gsi isch. Si Bresidäntschaft isch dur innepolitischi Reforme under em Schlaagwort New Deal zur Bekämpfig vo dr Wältwirtschaftskrise brägt. Under anderem isch d Sozialversicherig iigfüert worde und das het s Sozialwääse vo de USA für imme veränderet. Ussepolitisch si sini Entschäidige, Groossbritannie mit em Lend-Lease-Act im Kampf gege s Dütsche Riich z understütze, und d Atombombe z entwiggle und denn dr Iidritt vo de Veräinigte Staate in dr Zwäit Wältchrieg im Dezämber 1941 die bedütendste Eräigniss in sinere Karriere gsi. Dr Roosevelt het s Ändi vom Chrieg nüme erläbt.

Dr Roosevelt isch sit 1946 uf dr Vordersite vom US-Dime abbildet.